कोलम्बिया भूकम्पमा परि १३२ जनाको मृत्यु
काठमाडौं । कोलम्बियामा ७।४ म्याग्निच्युडको शक्तिशाली भूकम्प जाँदा कम्तीमा १३२ जनाको मृत्यु भएको छ । सयौं मानिस अझै बेपत्ता छन् ।
सरकारले प्रारम्भिक रूपमा १११ जनाको मृत्यु र ८७ जना घाइते भएको जनाएको थियो । तर कोलम्बियन एसोसिएसन अफ क्यापिटल सिटिजका अनुसार मृत्यु हुनेको संख्या १३२ पुगेको छ भने ५७० जना घाइते भएका छन् ।
कोलम्बियन जियोलोजिकल सर्भिसका अनुसार सोमबार गएको भूकम्प यो शताब्दीमा कोलम्बियामा गएको सबैभन्दा शक्तिशाली भूकम्प हो । भूकम्पका कारण पश्चिमी कोलम्बियाका काली, पेरेइरा, क्विब्दो र मानिजालेससहितका शहरमा ठूलो क्षति पुगेको छ । भूकम्पको धक्का छिमेकी इक्वेडर र पानामासम्म महसुस गरिएको थियो ।
अमेरिकी भूगर्भ सर्वेक्षण ९यूएसजीएस०का अनुसार भूकम्पको केन्द्रबिन्दु राजधानी बोगोटाबाट करिब ४०० किलोमिटर पश्चिममा रहेको चोको क्षेत्रको सान होसे डेल पालमारमा थियो । भूकम्प १०७ किलोमिटर गहिराइमा गएको थियो ।
भूकम्पपछि केही घण्टाभित्रै कम्तीमा २१ वटा परकम्पसमेत गएका थिए ।
संकटकाल घोषणा, खोज र उद्धार जारी
अलजजिराका अनुसार भवनका भग्नावशेषमा मानिसको खोजी जारी छ । उद्धारमा संलग्नहरूले कंक्रिटका ठूला टुक्रा र अन्य भग्नावशेष हातैले हटाइरहेको समेत देखिन्छ ।
स्थानीय अधिकारीका अनुसार कालीमा कम्तीमा २० वटा भवन पूर्णरूपमा भत्किएका छन् भने ३८० वटा भवनमा क्षति पुगेको छ । भत्किएका भवनमा धेरै मानिस फसेको आशंका गरिएको छ ।
राष्ट्रपति अबेलार्दो दे ला एस्प्रिएल्लाले सोमबार दिउँसो राष्ट्रिय सम्बोधन गर्दै देशभर संकटकाल घोषणा गरेका छन् । ‘राष्ट्रिय सरकारले जीवन जोगाउन, प्रभावित समुदायलाई सहयोग गर्न र आवश्यक ठाउँमा राहत पुर्याउन आफ्ना सबै संयन्त्र परिचालन गरेको छ,’ उनले भने ।
केही दिनअघि मात्रै एस्प्रिएल्लाले कोलम्बियाको राष्ट्रपतिको रुपमा शपथ लिएका थिए । नयाँ सरकारका लागि यो पहिलो ठूलो संकट बनेको छ ।
उनले भग्नावशेषमा फसेका मानिसको उद्धारलाई सरकारको पहिलो प्राथमिकता रहेको बताए ।
कोलम्बियाको प्रमुख कफी उत्पादन क्षेत्र रिसाराल्दामा मात्रै कम्तीमा ४० जनाको मृत्यु भएको स्थानीय अधिकारीले बताएका छन् । क्षेत्रीय राजधानी पेरेइरामा पनि ठूलो क्षति पुगेको छ बताइएको छ ।
भाये डेल काउका क्षेत्रमा कम्तीमा २७ जनाको मृत्यु भएको छ । मृतकमध्ये तीन जना बालबालिका छन् ।
भूकम्पको केन्द्र नजिकै पर्ने चोको क्षेत्रमा भने सञ्चार सेवा अवरुद्ध हुँदा क्षतिको पूर्ण विवरण आउन सकेको छैन । त्यहाँका केही क्षेत्रमा भूकम्प गएको घण्टौंसम्म मोबाइल सेवा सञ्चालनमा आउन सकेको थिएन ।
चोकोकी गभर्नर नुबिया क्यारोलिना कोर्डोबाकाले भने उक्त क्षेत्रमा १२ जनाको मृत्यु र ८४ जना घाइते भएको अनुमान गरिएको बताएकी छन् । स्थानीय अगुवाहरुका अनुसार ठूलो संख्यामा मानिस बेपत्ता छन् ।
चीनतर्फको ठूलो ताल फुट्यो, तिब्बतमा जारी उद्धार अभियान पनि स्थगित , नदीको तटीय क्षेत्रका नागरिकलाई सुरक्षित रहन रसुवा प्रशासनको सर्कुलर
काठमाडौं । जिल्ला प्रशासन कार्यालय रसुवाले चीनको छोचेन खोला र पुरेपू त्साङ्पो नदीको संगम छेउमा बनेको ठूलो ताल फुटेको जनाएको छ। प्रशासनले चिनियाँ
भारतको झारखण्डमा चट्याङ लागेर १४ जनाको मृत्यु, बाढी र पहिरोले जनजीवन प्रभावित
काठमाडौं । भारतका जम्मु–कश्मीर, केरल र झारखण्डमा भारी वर्षा, बाढीपहिरो र चट्याङका घटनाले जनधनको क्षति बढेको छ । झारखण्डमा मंगलबार चट्याङ लागेर
आज स्पेसएक्सको रकेटको टुक्रा चन्द्रमामा ठोक्किँदै
काठमाडौं । स्पेसएक्सको फाल्कन–९ रकेटको एउटा टुक्रा बुधबार चन्द्रमाको सतहमा ठोक्किने भएको छ । गत वर्षदेखि अन्तरिक्षमा अनियन्त्रित रूपमा
प्रतिकृया दिनुहोस