आमा बुवासँग सफलताको खुशी साट्न नपाएका चर्चित सेलिब्रेटी ।

SITENAME

काठमाडौं, – सन्तान सफल हुनुमा आमा बुवाको ठूलो भूमिका हुन्छ । आमा बुवाको साथ, सहयोग र हौसलाले नै एउटा सन्तानले जीवनको सही बाटो हिँड्ने अवसर पाएको हुन्छ । 

जसलाई आमा बुवाको साथ र सहयोग हुन्छ उसलाई जीवनमा अघि बढ्न सहज पनि हुन्छ । तर कसैलाई भने त्यो साथ मिल्दैन । तर पनि त्यस्ता व्यक्ति  सफलताको चुचुरोमा पुग्न सकेका हुन्छन् । आज हामीले यो सामाग्रीमा केही सफल व्यक्तिहरुलाई समेटेका छौं जसमध्ये कसैले सानैमा आमा गुमाए त कसैल बुवा । देशकै सफल र चर्चित व्यक्ति बन्दा उनीहरुले त्यो खुशी आफ्नो आमाबुवासँग साट्न पाएनन् । 

मदनकृष्ण श्रेष्ठ
व्रिकम सम्वत २००७ साल वैशाख ७ गते जितपुर फेदी काठमाण्डौंमा जन्मेका  वरिष्ठ कलाकार  मदनकृष्ण श्रेष्ठले जन्मेको ६ महिनामा आमालाई गुमाएर टुहुरो बने । आमाको दूध खाएर आमाको काखमै हुर्किने सौभाग्य उनले पाएनन् । 

बुवा  रामकृष्ण लाल श्रेष्ठ र आमा लक्ष्मी देवी श्रेष्ठको कोखबाट जन्मेका उनले आमाको काख गुमाएपछि बुवा र फुपुहरुको काखमा हुर्कने मौका पाए । वरिष्ठ हाँस्यव्यङ्ग्य कलाकार बनेका उनले जीवनमा यो सफलताको खुशी आमालाई सेयर गर्न पाएनन् । तर उनले बुवासँग भने यसको केही अनुभव, खुशी र सफलताहरु सेयर गर्ने अवसर पाए । 

हरिवंश आचार्य
विक्रम सम्वत २०१४ साल कार्तिक २७ गते काठमाण्डौंको गैरी धारामा जन्मेका हरिवंश आचार्य हाँस्यव्यङ्ग्यका अर्का वरिष्ठ कलाकार हुन् । बुवा होमन्जय आचार्य र आमा गणेश कुमारी आचार्यका कान्छा छोरा हरिले टुहुरो हुनुको पीडा राम्ररी बुझेका छन् । 

हरिवंशका बुवा होमन्जयले ५३ वर्षको उमेरमा १३ वर्षकी गणेशकुमारीसँग विवाह गरेका थिए । बुवा ७३ वर्षको हुँदा हरिवंश जन्मिए । उनले ६ वर्षको उमेरमा बुवालाई गुमाए । १३ वर्षको हुँदा उनकी आमाको निधन भयो । उनी दिदीहरुको छत्रछायाँमा हुर्केका हुन् ।  आमा बुवाको निधन हुने समयमा उनले कलाकारिताको सुरुवातै गरेका थिएनन् ।

टुहुरो दिनहरुमै उनले कलाकारिताको संघर्ष सुरु गरेका थिए । निरन्तरको संघर्षले उनलाई एउटा अब्बल कलाकारको रुपमा उभ्याइदियो । जीवनको यो खुशी आमा बुवासँग साट्न नपाउँदा कहिले काही हरिको मन चसक्क हुन्छ ।

राजेश हमाल
महानायकको ट्याग पाएका अभिनेता राजेश हमालले नेपाली सिने उद्योगमा दर्जनौं सफल सिनेमा दिएका छन् ।  परिवारको इच्छा विपरित सिनेमामा लागेर सफलता पाएका राजेश हमालका बुवा पनि यो संसारमा छैनन् ।

राजेशले २०४९ सालमा बुवालाई गुमाएका थिए । उनका बुवा रसियन राजदुत थिए । यसै क्रममा उनको निधन पनि रसियामै भएको थियो ।  बुवा जिवित हुँदै उनले सिनेमाको काम थालेका थिए । तर महानायकको ट्याग पाएपछि भने त्यो सफलता उनले बुवालाई देखाउन पाएनन् । बेला बखतमा विदेशमा हुने घटनामा राजेश हमाल निकै नै भावुक हुने गरेका छन् ।

गएको वर्ष अफगानिस्तानमा मारिएका नेपालीको शव नेपाल आएपछि उनले सामाजिक सञ्जालमा एक स्ट्याटस पोस्ट गर्दै विदेशमा आफन्त गुमाउनुको पीडा आफूले बुझ्ने भन्दै दिवंगत नेपालीहरुलाई श्रदान्जली दिएका थिए ।

दीपकराज गिरी
हाँस्य कलाकार दीपकराज गिरी पनि सानैमा आमा गुमाउने कलाकारमा पर्छन् । आमाको छत्रछायाँमा उनले जीवनका चार वर्ष मात्रै गुजारेका छन् । सानैमा आमाको मायाबाट टाढिएका दीपक लामो समयको संघर्षपछि जीवनमा सफल कलाकारको रुपमा स्थापित भए ।

तर उनले यो सफलताको खुशी आमासँग साट्ने सौभाग्य भने पाएनन् । उनले आफ्ना बुवालाई भने यो खुशी साट्न पाइरहेका छन् । दीपकका बुवा भने अहिले उनीसँगै छन् । कलाकार बन्नु अघि दीपकराज गिरीले असइको जागिर छोडेका थिए ।

प्रहरी सहायक निरिक्षकका भर्ना भएर उनले चार दिन काम गरे । तर सुरुवाती दिनमै यो ट्रेनिङ गाह्रो लागेपछि उनले यो जागिर छोडेर भाग्ने निधो गरे । उनी सरकारी जागिर छोडेर कलाकारिता तिर मोडिएका हुन् । 

दीपाश्री निरौला
कलाकार तथा निर्देशक दीपाश्री निरौलाले जीवनमा पाएको सफलता आमालाई देखाउन पाइनन् । तर उनको आमा प्रतिको श्रद्धा भने बढी नै छ । उनले आफ्नो मोवाइलको वाल र फेसबुक वालमा आमालाई राखेकी छिन् ।

जीवनमा पैसा कमाएर घर किनेको दिनमा उनले आमाको तस्विरलाई नै ल हेर्नुस १ आमा घर,  भनेर देखाएको बताउँछिन् । दीपाश्री १५ वर्षकी हुँदा उनकी आमाको देहान्त भएको थियो ।  उमेरमै आमाको निधन भएर बुवा एक्लो भएपछि दीपाश्रीले बहिनीहरुसँग मिलेर बुवाको दोस्रो विवाह गरिदिएकी थिइन् ।

उनकी दोस्रो आमाबाट पनि एउटा भाई र बहिनी  छन् । दीपाश्रीले आमाको निधन भएपछि नै अभिनयको सुरुवात गरेकी हुन् । टेलिसिरियल ‘अग्निपथ’बाट अभिनय थालनी गरेकी उनले त्यसपछि रेडियो नेपालमा दीपक राज गिरीसँग राम विलास र धनिया नामक कार्यक्रम सञ्चालन गरिन् । यस अवधिमा उनले केही सिनेमाहरुमासमेत अभिनेत्रीको रुपमा काम गरेकी थिइन् ।

पछि २०६० सालमा सुरु भएको ‘तितो सत्य’ले उनलाई एउटा कलाकारको रुपमा स्थापित गरिदियो । उनी ‘तीतो सत्य’ बनेपछि नै आफ्ना  खुशीका दिनहरु सुरु भएको बताउँछिन् । तर उनले यी सबै खुशीहरु आमासँगै बसेर सेयर गर्न भने पाइनन् ।

केदार घिमिरे
केदार घिमिरे अर्थात माग्ने बुढाले सात वर्षको उमेरमा आमा गुमाए । उनकी आमाको निधन फोक्सोको क्यान्सरका कारण भएको थियो । केदारले विवाहपछि कलाकारिताको सुरुवात गरेका हुन् । 

उनले यस अघि काठमाण्डौंका फुटपाथमा साग बेच्नेदेखि टेम्पो चलाउने र  घरमा रंङ लगाउने कामसम्म गरे । यिनै संघर्षका दिनमा सन्तोष पन्तको ‘हिजो आजका कुरा’बाट कलाकारिताको सुरुवात गर्ने अवसर पाएका उनले त्यसपछि जितु नेपालको  कार्यक्रम ‘गीतान्जली’मा काम गर्ने मौका पाए । उनले  तितो सत्य र जिरे खुर्सानीमा पनि काम गरे तर उनलाई २०६२ सालमा बनेको टेलिश्रृङखला ‘मेरी बास्सै’ले सफलता दियो ।

उनी मेरी बास्सैपछि माग्ने बुढाको रुपमा सबैको प्रिय कलाकार बन्न पुगे । उनको यो लोकप्रियता अहिले पनि कायमै छ । पछिल्लो समय उनी सिनेमामा हाँस्यकलाकारको रुपमा छाएका छन् । केदारले जीवनका यी खुसी आमासँग साट्ने अवसर भने पाएनन् ।

मनोज गजुरेल
हाँस्यव्यङ्ग्यका राजा मानिने कलाकार मनोज गजुरेल पनि बुवा  गुमाउने पीडामा परे । सानै छँदा बुवा बितेपछि उनले घरमासमेत धेरै बस्न पाएनन् । उनले घरभन्दा बाहिरै बसेर अध्ययन गरे । 

अध्ययनपछि कलाकारितामा लागेका उनले लामो समयको संघर्षपछि  हाँस्यकलाकारको परिचय पाए । अरुको गेटअप र आवाज हुबहु नक्कल गर्ने उनी नेपाली हाँस्यव्यङ्ग्य जगतमा कमेडी किङका रुपमा छाएका छन् । उनले यो सफलता आफ्नो बुवालाई देखाउन पनि पाएनन् ।

मनोजले यसै वर्ष अमेरिकाका राष्ट्रपति डोनाल्ड ट्रम्पको पनि क्यारिकेचर गरे जसले उनी अमेरिकाका विभिन्न अनलाइनहरुमासमेत छाएका छन् । केही दिन अघि मात्रै उनलाई अमेरिकाको अनलाइन पोर्टल सीबीएसले  डोनाल्ड ट्रम्पको नक्कल गर्ने विश्वका १८ कमेडीयनहरुको सूचिमा समावेश गरेको थियो ।

विल्सन विक्रम राई
अर्का हाँस्यकलाकार विल्सन विक्रम राइले पनि जीवनमा धेरै दुख देखेका छन् । ९ वर्षको उमेरमा आमा गुमाएपछि उनले सानै उमेरमा परिपक्व भएर भाइबहिनीको जिम्मेवारीसमेत सम्हाल्नु परेको थियो । जीवनमा यिनै दुःख र जिम्मेवारीको यात्रा गर्दागर्दै उनले कलाकारितामा पाइला टेके । 

हिरो बन्न काठमाण्डौं आएका उनलाई सिनेमा भन्दा पनि हाँस्यव्यङग्य फाप्यो । उनको गृह जिल्ला झापामै भएको एक कार्यक्रममा केदार घिमिरे उर्फ माग्ने बुढाले उनलाई देखेपछि उनलाई ‘मेरी बास्सै’मा अवसर दिए । ‘मेरी बास्सै’मा  उनलाई तक्मे बुढाको रुपमा प्रस्तुत गरियो जुन चरित्रले उनको जीवनमा कायापलट गरिदियो ।  एकाएक विल्सन हाँस्यकलाकारको रुपमा सबैको प्रिय बने ।  

यसका अलावा उनले केही सिनेमाहरुमा पनि काम गरेका छन् । ‘मेरी बास्सै’मा काम गर्नुअघि नै उनले सिनेमा ‘सायद’मा काम गरेका थिए । तर उनको यो सिनेमा ‘मेरी बास्सै’ भन्दा पछि रिलिज भयो । ‘सायद’ रिलिज भएपछि उनलाई सिनेमामा पनि सफलता मिल्यो । त्यसपछि उनको कलाकारिता निरन्तर दौडिरहेको छ । नेपालमा सफल भइसकेका उनले दुइवटा हिन्दी सिनेमामासमेत काम गरिसकेका छन् ।

ऋचा शर्मा
अभिनेत्री ऋचा शर्माले २० वर्षको उमेरमा बुवालाई गुमाइन् ।  बुवा ५४ वर्षको हुँदा ऋचाको जन्म भएको थियो । बुवाको निधनताका ऋचाले मिस नेपालमा भाग लिएकी थिइन् भने केही म्युजिक भिडियोहरुमा काम गरेकी थिईन् ।

उनको सिनेमामा प्रवेश भइसकेको थिएन । पहिलो सिनेमा ‘फस्ट लभ’ रिलिज भएको समयमा  ऋचाले बुवालाई खुबै सम्झिइन् । सिनेमामा राम्रो गरेर राष्ट्रपतिको हातबाट अवार्ड पाउँदा पनि ऋचाले बुवालाई धेरै खोजिन् । उनी अझैपनि कुनै निर्णय तथा ठूलो सफलता मिल्दा बुवालाई नै सम्झिने गर्छिन् ।

पछिल्लो समयमा  ऋचा अभिनेत्रीका साथै निर्मात्री पनि बनेकी छिन् । उनले ‘आधा लभ’ र ‘सुनकेशरी’ जस्ता सिनेमा निर्माण गरेकी छिन् । सिनेमा ‘सुनकेशरी’ जेठ २१ गतेबाट प्रदर्शनमा आउँदैछ ।

नाजिर हुसैन
अभिनेता नाजिर हुसेनकी आमाले त उनी कलाकार भएको हेर्न पाइनन् । अहिले राम्रो अभिनयका कारण चर्चामा रहेका नाजिरले केही वर्षअघि मात्रै आमालाई गुमाएका हुन् ।

  

कलाकारिताको क्रममा काठमाण्डौंमा उनले एक हदसम्म खानकै लागि संघर्ष गर्नु परेको थियो । जसोतसो आफूलाई मन परेको काम गर्न पाएका नाजिरलाई जीवनमा सबै भन्दा ठूलो झड्का आमाको निधनले दिएको थियो । काठमणडौंमा आएर भर्खरै कलाकारिताको सुरुवात गरेका नाजिर उक्त दुखद खबरपछि आफ्नै गाउँ फर्के । शोकमा डुबेका नाजिरले कैयौँ दिन आमालाई दाहसंस्कार गरेको स्थानमा रोएर नै बिताएको बताउँछन् । 

उनका सिनेमा व्यवसायिक रुपमा खासै सफल नभए पनि उनी राम्रो अभिनेताको रुपमा चिनिएका छन् । नाटकबाट सिनेमामा फड्को मारिसकेका नाजिरले यो खुशी आमासँग साट्न नपाएको भन्दै हामीसँग दुःख प्रकट गरे ।

रजनी केसी
अभिनेत्री रजनी केसीका बुवा पनि यो संसारमा छैनन् । झण्डै चार वर्षअघि उनका बुवाको निधन भएको थियो । सिनेमा ‘परदेशी’बाट अभिनेत्रीको रुपमा चिनिएकी रजनीको कलाकारितालाई निरन्तर हेर्नको लागि उनका बुवा यो संसारमा छैनन् । 

यो कुराले रजनीलाई अत्यन्तै दुःख लाग्छ । पछिल्लो समयमा उनी आफ्नो आमालाई नै सबथोक मान्छिन् । सबै कुरा सेयर गर्ने साथी आमा भएको भन्दै उनले आमालाई नै प्रेमीको संज्ञा पनि दिइन् । उनले आमा, आमा मात्रै नभयर साथी, प्रेमी जे भने पनि उहाँ नै भएको बताइन् । 

छविराज ओझाको सिनेमा  ‘लोफर’बाट सिनेमामा डेब्यु गरेकी रजनी यतिबेला एपी वान च्यानलको टेन टु फाइन नामक सिरियलमा काम गरिरहेकी छिन् । 

प्रतिकृया दिनुहोस
SITENAME

सञ्चारकर्मी तथा गायक नविन जेठारा महासागरको “जीवन कहानी” म्युजिक भिडियो सार्वजनिक

भुवन महरा/रेडियो सुदुरआवाज डडेल्धुरा २४ बैशाख २०७५, डडेल्धुरा –  सञ्चारकर्मी तथा गायक नविन जेठारा महासागरको “जीवन कहानी” म्युजिक भिडियो

SITENAME

इरफान खानलाई यो कस्तो ‘रोग’ लाग्यो

तेह्र वर्षअघि इरफान खानको एउटा फिल्म रिलिज भएको थियो ‘रोग’ । तेह्र वर्षपछि चर्चित अभिनेता इरफान खान आफैलाई यस्तै ‘रोग’ लाग्यो कि उनलाई

SITENAME

थेगोले हिट भएका यी कलाकार ।

का‌ठमाडौं,  नेपालमा हाँस्य कलाकारको लोकप्रियता र कमाई लोभ लाग्दो छ । टेलिश्रृंखलामार्फत जन्मिएका हाँस्य कलाकारको पछिल्लो समय ठूलो पर्दामा समेत